O le Itumalo lenei o Palauli No.1 sa ta’ua o Palauli Sisifo.  E ono (6) afioaga o lenei itumalo: Foailalo,
Foailuga, Satuiatua, Salailua, Siutu ma Taga. 
O lo’o faapipii atu i lalo le fa’afanua mo le silafia:

O le tusigāigoa a
le Ofisa o Fuainumera Faamauina i le 2016 sa fa’amauina ai le faitau aofai o le
itumalo atoa e 3,334.  E 1,686 alii ae
1,648 tamaitai.  A o le tusigāigoa o
Novema 2021 sa fa’amauina ai le si’itia o le aofai o le itumalo i le
3,451.  O lona uiga e 117 le fa’aopoopoga
o le itumalo i lenei 5 tausaga.

O le vaevaega i
afioaga taitasi o le itumalo o le faitau aofa’i ia Novema 2021 o lo’o faapipii
atu mo le silafia:

O le toatele o le
afioaga e i le va o le 15-64 tausaga (1,813) ma e 95 ē o lo’o faamauina e iai o
latou aafiaga tumau; e 44 alii ae 51 tamaitai[1]. 

O le tele o afioaga e tū lalata i le sami ma o se
suesuega a le Matagaluega o Punaoa Fa’anatura ma Siosiomaga (MNRE) i le 2018 sa
fa’amauina ai le manaomia e toe sifi i tua (mamao ese mai ma le sami) le auala
tele a le Malo aua puipuiga mai le si’isi’i o le sami faapea ai ma lamatiaga i
eleele tafia i le gataifale, ma e ono aafia i ni fa’alavelave ma’ale’ale faalenatura
(ft: sunami, galu tetele) ona motusia ai lea o feso’otaiga ma femālaga’iga mo e fia malaga i le falemai a le itumalo

Aoga – o le Aoga Maualuga a le Itumalo (College) e i
Salailua ma e 355 le aofa’i o alo ma fanau o lo’o aoaoina ai i le 2023; e 292 mai le itumalo o Palauli No.1, 48 mai Salega 1 & 2 [2] ae 15 mai le itumalo o Vaisigano[3].  E 3 aoga Tulagalua (Primary Schools); Salailua, Gagaemalae Satuiatua ma Taga.  O alo ma fanau mai Siutu o lo’o a’otauina i le Primary School i Salailua a’o alo ma fanau a Foailalo ma Foailuga o lo’o a’otauina i le Primary School i Gagaemalae, Satuiatua.  E 6 A’oga Amata.  E 4 (1 Taga: SDA; 1 Satuiatua (Metotisi); 1 Foailalo (Metotisi); 1 Salailua (private) ua resitaraina ae 2 e le’i resitara
ona o aiaiga a ekalesia (ofo fuaina o le auaunaga).  O le aofaiga atoa o fanau a le Itumalo i totonu o aoga nei o lo’o faapipii atu

E iai nisi o fanau a le itumalo na ausia togi manaomia e a’otauina ai i le Univesite i Le Papaigalagala (National University of Samoa) i le 2023. O nisi o nei fanau o lo’o totogiina ō latou pili e le Malo (sponsored), o nisi o lo’o totogi e
Faifeau o ō latou afioaga, a’o isi o lo’o fesoasoani iai aiga ma tama fanau a
le itumalo.

Suavai – O afioaga i le itu sisifo o le itumalo o lo’o fa’aaogaina le suavai mita lea ua fa’amamāina a le Pulega o le Suavai a’o isi o lo’o fa’aaogaina suavai mai vai tumaoti, vai timu, a’o nisi o lo’o faalagolago pea i loli vai e maua ai le suavai.  Na faamauina i le CIM o lo’o iai vai ‘taele’ a le itumalo ae o le tele o nei vai taele e le mamā ma e tele ina mai.

Eletise – ua tele ina so’o le itumalo ua ola i le eletise ae
to’a laiti lava nai aiga o lo’o fa’aaoga pea molī sela ma molī kerosini e
faamumū i le po.  E tele ina leai ni molī
auala i nu’u tūtotonu ma mamao ese mai ma le auala tele a le Malo.

Soifua Maloloina – E iai le falemai fa’aitumalo o lo’o i Foailalo. O se auala foi lea o lo’o maua ai galuega a nisi o tamaitai tausi ma’i o le itumalo.

Mata’aga/Fale Talimalo – o le mata’aga pito ta’uta’ua i totonu o le itumalo o le Pupū (Blow Holes) o lo’o i le afioaga o Taga.  E tasi le fale talimalo; Satuiatua Beach Resort, ma o lo’o maua ai foi galuega a nisi o le itumalo.

Fa’atoaga ma Faigafaiva – e iai fa’asao a nisi o afioaga o le itumalo ae o le fa’asao e pito sili ona tele ona i’a ma figota e maua ai, o le faasao i Satuiatua.  E 544[1] tagata o le itumalo e galulue i galuega fa’afaatoaga.

E iai le talitonuga o le fesoasoani mai a le tatou Malo e auala mai i le Poloketi 1Miliona faapea ai faiga Pa’aga ma matagaluega eseese, Paaga Atinae o Samoa (development partners) ma Tama Fanau a lenei itumalo, o se fesoasoani tele lea i tagata o le itumalo e maua ai se tulaga mausalī i le itu tau tamaoaiga, saogalemū, soifua maloloina ma filemu aemaise se siosiomaga tamaoaiga i le ‘oa faalenatura.